Municipality of Alegria

Home » NEWS Updates » SOMA 2010 3rd SOMA (Report)

SOMA 2010 3rd SOMA (Report)

Higugmaa-ang-Ginoo
HOME PAGEAbout AlegriaBARANGAYSNews UpdatesOffice DirectoryPublicationTourist SpotsPrograms and Projects

STATE OF THE MUNICIPALITY ADDRESS- 2010

(3RD SOMA REPORT)

Municipality of Alegria, Province of Surigao del Norte

June 15, 2010

HON. DOMINADOR G. ESMA, JR.

Municipal Mayor

To the Honorable Members of the Sangguniang Bayan, Hon. Vice-Mayor Ernesto C. Odjinar, Sr., sa mga Barangay Captains iban sa ila Barangay Council, mga personahe sa government line agencies, municipal head of offices and employees, representatives from the different civil society organizations, an ato taga Dep-Ed personnel gikan sa Alegria District na tagpangulohan ni Mam Rosario P. Benitez, gikan sa Alegria National High School na tagpangulohan isab ni Dr. Norma S. Zamora, sa ato pinasidunggang bisita, to all Alegriahanons… Marajaw na hapon dijo hurot…..

Kuman na hapon ako ipabati sa ijo an ika-tulo nako na pagdeliver sa State of the Municipality Address-2010 nga naglangkob sa milabay na tuig 2009 nga kalambuan sa ato lungsod ug sa karon nga tuig na mga plano ug programa.

Apan una sa tanan, dawata nijo an dako namo na pasalamat gikan sa ESMA family, sa ako minahal nga asawa na si Teling iban sa ako mga anak.. an dako namo na pasalamat sa ijo pagsuporta sa ikaduha nako na termino isip ijo mayor sa musunod na isab na tulo ka tuig nan ako pagdumaya sa ato minahal na lungsod. Dako isab nako na pasalamat labaw sa tanan sa labaw’ng makagagahum na ija ako tagtugotan pagdumaya sa ato lungsod… ug agig sukli nan ini na kompiansa.. ako paningkamotan uban sa bulig sa ato ginoo… sa umaabot nako na mga kaibanan isab na mga opisyales na ijo tagpili, kan umaabot vice-mayor dr. uldarico “boboy” uriarte, jr. ug sa mga sb members .. na amo ipadajon ang kalambuan sa Alegria inibanan sa ijo tinuoray na kooperasyon aron makab-ot nato an tagkinahanglan na karajawan.

Sa naadan, tugoti ako nijo pagpadayag sa mga accomplishments sa milabay na tuig 2009…

1. Sa local legislation… an ato mga magbabalaod, mga SB Members sa ato lungsod, mipasaka ug miaprobar sa daghan na mga resolutions ug ordinansa.. may 71 ka resolutions ug 18 ka mga ordinansa ang ilang napasar diin kini maoy naghatag ug gabay sa kalambuan sa ato lungsod. Ato pasalamatan an ato mga SB Members pinangulohan sa ato maabtik na bise-mayor na amoy presiding officer, si Hon. Ernesto “Boy” Odjinar, Sr.. A big hand to them sa ila bayanihong mga buhat….

2. Sa Transparency and Accountability… an ato lungsod kuman suyod na sa tulo ka tuig nagpasiguda sa One Stop Shop in applying local permits and licenses. Sa kanunay, nagpahigayon kita sa tagla-ong na citizens participation diin jaoy membership participation an ato mga rehistradong civil society organizations ug aktibo sila na miapil sa nagkadaiyang special bodies sama sa municipal development council, municipal school board, municipal health board, municipal disaster coordinating council ug iban pa na mga komitiba na tag-mugna sa ato lungsod na amoy naghatag ug kahigayonan nga mabati an ila tingog diha sa konseho ug mga komitiba kay ubos sa ako administrasyon, gikinahanglan nga mahibaw-an sa kadaghanan ang mga plano ug programa nga ipahigayon diha sa atong mga katawhan.

Ato tagpaningkamotan isab na mapadali ang mga serbisyo sa matag opisina pinaagi sa pag-adopt sa citizens charter, kini na mga serbisyo kinahanglan mahatagan sa makanunayon ug dinaliang aksiyon.

Sa kanunay ato tagpahibayo an mga plano ug programa pinaagi sa paghimo ug regular na pulong-pulong diha sa asembliya ingon man pagpahigayon ug mga panagtigum sa mga hingtundan na mga stakeholders.

Aduna kitay website na taghimo na amo an “ alegriasurigao.wordpress.com”diin kini kanunay gisudlan ug mga impormasyon, mga kalambuan na makita did-on sa amo na website alang sa kasayuran dili lamang kanato dinhi sa alegria kon dili isab sa iban na mga tawo sa laing lugar na gusto makahibayo kon uno na ang Alegria kuman.

3.  Sa Strategic Planning and Project Development… Sa pagkakuman, hamok na an ato mga proyekto suyod sa primero nako na termino. Bunga ini sa taghimo nato na mga strategic planning activities na taghimo sa ato mga opisyales ug sa mga head of offices sanan sa ato mga opisyales sa 12 ka barangays diin ato  tag-identify an mga proyekto na tagkinahanglan sa komunidad. Ini na mga kalihokan tagpanguyohan sa Municipal Planning and Development Coordinator’s Office (MPDC). An ato lungsod nakahimo nan Executive and Legislative Agenda (ELA), Annual Investment Plan (AIP), State of Local Governance Report (SLGR) matag tuig, pagpadayon sa paghimo ug Comprehensive Development Plan (CDP) ug pagtapos isab sa Community Based Monitoring System (CBMS). Inin tanan na mga plano ug dokumentos amoy naghatag kanato ug giya unhon nato pagpalambo sa ato lungsod. Ato isab pangusgan kuman ang pagpatuman sa comprehensive land use plan (CLUP) diin ini na plano preparar isab na maplastar na ang ato lungsod sa umaabot na mga kalambuan. Daku-dako ini na trabahoon kay dinhi ato iplastar kon hain an commercial ug industrial district.

Sa paghatag nijo nan lain na isab na termino sa ijo kuman na mayor, ato ipadajon an mga plano ug programa nga nalatid sa amo na mga dokumentos kay ini man ang tagla-ong nila na bibliya sa kalambuan isip sumbanan natong tanan.

Mapasalamaton kita sa Dept. of Interior and Local Government (DILG) sa ila technical assistance pagpahigayon ug mga trainings/workshops aron ato mahimo ini na mga plano, iban isab sa Dept. of Agriculture (DA), Dept. of Agrarian Reform, Dept. of Environment and Natural Resources (DENR), Dept. of Labor and Employment (DOLE), Dept. of Social Welfare and Development (DSWD), Dept. of Health (DOH) ug ang Dept. of Education (DepEd) sanan iban sa mga financial institution gikan sa gawas sa ato nasud  kon foreign donors sama sa USAid, AusAid, IFAD, World Vision-Australia, AECID-Spain ug World Bank.

4. Sa Revenue Generation and Fiscal Management…Sa milabay na tuig 2009, an lungsod nan Alegria may total income na misuyod sa ato panudlanan na mikabat nan 33 milyones 129 mil 678 pesos (Php 33,129,678.00). Ang breakdown amo inin mosunod:

Internal Revenue Allotment (IRA) – P 29,536,597.00

Local Income – P 2,665,434.00

Other Revenues (Miscellaneous Income) – P 927,647.00

Kon ato sumadahon, ang ato Locally generated income and other revenues sa milabay’ng tuig 2009 mikabat sa kantidad 3 milyones 593 mil 81 pesos (Php 3,593,081.00) ikomparar nato sa tuig 2008 na mikabat lamang nan 2 milyones 86 mil 165 pesos 48 centavos (Php 2,086,165.48) namay increase na 58.06%.

Gikan sa ako pagdumaya na nagsugod sa Julio, 2007… nag-anam kadako an ato koleksiyon sa local income, amo man gani na ang lungsod sa alegria nag-una kuman tibook probinsiya sa koleksiyon sa real properties, permits and licenses.. ug consistent kita na number 1 sa tibook probinsiya nan surigao del norte  gikan sa tuig 2008 ug sa milabay na tuig 2009. Aya ini mahitabo sa milabay na mga mayor nga nagdumaya sa ato lungsod. Ato palakpakan an taga Mun. Treasurer’s Office ug sa Municipal Assessor’s Office for a job well done…

Dugang na impormasyon, kon mo-operate na an ato water system level 3 sanan terminal, inin duha nato ka mga dagko na income generating enterprise, magka-anam pa gajud pagdako an koleksiyon sa ato lungsod. Amo ini ang mohatud sa Alegria sa dugang na kalambuan sanan mosuyod na dinhi sa ato lungsod an mahamok na investments kon mga negosyo. Kon mohamok na an investments, dayag karadjaw na mahamok na isab makatrabaho. Pagta-as nan ato local income, dili na 5th class an ato lungsod kon dili ma 4th class na ini ug padajon ini na mosaka hangtud an lungsod sa Alegria mahimo na na1st class municipality.  Manghinaut kita na madaya ini pagdajaw alang sa tinusbawan nan ato lungsod, of course, uban sa pagbulig natong tanan nga taga-Alegria giniyahan sa ato labaw na makagagahum na si Jesukristo.

5. Sa Human Resource Development and Management ug sa Customer Service… Aron mahimong epektibo ang pagpadagan sa ato lungsod, aduna kitay gitawag nga organizational set-up sa ato lokal na pangagamhanan. Ang lgu organization adunay 12 ka mga elected officials nga naglangkob sa mayor, bise-mayor, 8 ka mga regular members sa Sangguniang Bayan ug

duha ka ex-officio SB Members nga mao ang ABC President ug SK Federated President. Aduna kitay 13 ka mga lokal na opicina na may 13 isab ka mga head of office na amoy nagdumaya nan ini, 36 ka mga permanent employees ug aduna kitay mga 65 ka mga job orders nga gi-assigned sa matag opisina aron mapahigayon ang maayong serbisyo ngadto sa mga cliente nga nagkinahanglan.

Sa milabay’ng tuig 2009, padajon an LGU Alegria pagpadaya nan ija mga empleyado ngadto sa mga trainings ug seminar-workshops aron paghimo nilang hanas sa tagsa-tagsa nila ka mga trabaho.

Sanan sa milabay na December 21, 2009 atol sa taghimo nato nan Christmas Party, an LGU Alegria pinaagi sa PRAISE na programa kon Program on Awards and Incentives for Service Excellence mihatag ug pasidungog sa duha ka mga local offices, an MPDC Office na tagdaya ni Mr. Edipolo Mosquito, Jr. sanan sa MSWDO na tagdaya isab ni Mrs. Arlyn Pasia-Gabeligno. Matag isa kanila nakadawat nan plaque of commendation as Best Office Practices Implementor sanan cash award na tag singko (5) mil ka pesos. Ini amoy hagit isab sa iban na mga opisina tungod kay himoon nato inin PRAISE Awarding kada tuig paghatag nan pasidungog sa mga opisina na nakabulig sa kalambuan sa ato lungsod.

6.  Sa Health and Nutrition… Sa tuig 2009, padajon an ato lungsod paghatag ug suporta sa panginahanglan sa maayong panglawas sa ato mga katawhan pinaagi sa makanunayong  konsulta niadtong may mga sakit o balatian. Ato isab tagpaigoan paggahin ug pundo sa ato local na panudlanan, ang supply sa medisina diha sa ato municipal health center ug sa iban pang mga serbisyo medical sama diha sa Birthing Clinic ug TB DOTS Clinic.

Segun sa MHO record sa tuig 2009, ang nanganak did-on sa ato Alegria Birthing Clinic nokabat sa 200 ka mga nanay sa tibook lungsod.

Sa milibay isab na tuig, ang ato lungsod nakapahigayon ug duha ka medical mission na tag sponsoran nila ni congressman romarate, rotary club of cebu and manila ug sa Couples of Christ iban sa pagtabang nila Dr. Susan Uriarte-Valmayor, Dr. Uldarico Uriarte, Jr. ug Engr. Young Vicente diin libre ang konsultasyon ug mga medisina na tagpanghatag sa mga katawhan. Padajon an ato pagpanuli, dental services,  minor operations ug iban na serbisyo medical tibook tuig tungod sa tabang isab ni dr. uldarico “boboy” uriarte na kuman ijo tagpili na bise-mayor sa ato lungsod.

Sa ikaduha nako kuman na termino, ato ipadajon an paghatag ug maayong serbisyo sa panglawas iban nila congressman Jun romarate, incoming governor sol matugas ug kan incoming vice-mayor dr. uldarico uriarte, jr.

Kabahin sa ato nutrition program, padajon an ato pag pang-apod apod ug libre na mga vegetable seeds sa mga kabarangayan ug diha sa ato mga eskuelahan ug padajon isab na ato tagsuportahan an programa sa Dept. of Health, an Garantisadong Pambata Program aron masumpo ang malnutrition sa ato mga kabataan dinhi sa ato lungsod.

Ato isab tagpadajon ang coverage program sa philhealth sa dul-an dos mil ka mga pamilya gikan sa pondo ni congressman jun romarate sanan sa ato lokal na pangagamhanan nan alegria.  Dako nato ini na pasalamat kang Congressman Jun Romarate. Dako isab ako pagtoo na an ato umaabot na Gobernador Sol Matugas, mohatag isab nan philhealth sa waya pa makadawat nan ini na prebilihiyo tungod kay nasentro man an ija programa sa health and education.

[rockyou id=157991166&w=426&h=320]

7.  Sa natad Edukasyon… Sa milabay na tingtungha 2009-2010, an ato lungsod nagpahigayon nan high school scholarship program sa 98 ka mga estudyante did-on sa Alegria National High School sanan may upat (4) ka mga estudyante sa koliheyo na jaon kuman mag-eskuela sa Caraga Institute of Technology. Ini na programa para ini sa mga poor but deserving students.

Sa miagi isab na tuig, mihatag an LGU Alegria gikan sa ija Special Educational Fund (SEF) para sa Brigada Eskwela ug sa iban pa na mga kalihokan sa eskuelahan sama sa scouting ug palaro.

May tabang isab na nadawat sa ato mga elementary pupils sa tuig 2009 gikan kang Engr. Young Vicente ug sa LGU Alegria sama sa school bags, notebooks, pencils/ball pens ug writing pads na gipang apod-apod sa mga eskuelahan. Kini dugang suporta ngadto sa ato mga elementary

pupils ug gikalipay kinig dako sa mga hingtundan nga ginikanan.  Dugang isab na kasayuran kanatong tanan, ang ato halangdon na Gobernador Sol Matugas mo-sponsor nan scholarship program sa kolehiyo sa ato mga deserving students na bag-o pa migradwar sa high school sugod kuman na tuig tingtungha 2010-2011 hangtud sila mogradwar sa upat ka tuig na kurso ubos sa mga conditiones nga gilatid sa amo na scholarship program sa probinsiya.

8.  Sa Social Welfare Development… Ang Local Government Unit sa Alegria makanunayon nga nagmintinar sa 13 ka mga day care centers sa ato lungsod, sa mga sueldohanan sa ato mga day care teachers,  pagpahigayon ug mga enhancement trainings aron mamahimo silang epektibo sa pagtudlo sa mga pre-schoolers. May 210 ka mga pre-school children na narecognisar o migradwar sa tuig 2009 sa 13 ka mga day care centers tibook lungsod.

Ang mga serbisyo ug programa nga gipahigayon sa MSWDO naglakip isab sa assistance to individual in crisis situation, pre-marriage counseling uban sa Mun. POPCOM Office, referrals, assistance to VAW-C and child abuse clients ingon man suporta sa senior citizens group na kuman ato tag-tagaan nan opisina aron ad-on sila magpahigayon nan ila inadlaw na kalihokan.

Agi ug suporta isab sa Hunger Mitigation Program sa national government, ang LGU Alegria pinaagi sa MSWDO makanunayong nagmonitor sa mga Tindahan Natin Outlets nga namaligya nan NFA rice sa makatarunganon na presyo.

Sa katapusang tuyo ka buyan sa tuig 2009 (last quarter of 2009), an poblacion, san pedro sanan alipao may 500 ka mga indigent families an nakadawat sa Pantawid Pamilyang Pilipino Program (4Ps program) gikan sa Dept. of Social Welfare and Development (DSWD). Ini na mga pamilya na tagpili pinaagi sa survey na taghimo sa amo na ahensiya, modawat ug binulan na cash assistance gikan sa DSWD Manila na adto nila mawidraw sa Land Bank Surigao Branch. Sa milabay na buyan sa mayo 2010, ila nadawat an duha ka buyan na cash assistance sa dili moubos sa tag-isa ka libo sa matag pamilya matag buyan ug dako ini karajaw  na tabang ubos niiini na national program. Gawas nan DSWD na amoy nag lead sa 4Ps program, ini tagbuligan isab sa iban partner line agencies sama sa Dept. of Health, Dept. of Education, DILG, National Anti-Poverty Commission ug LandBank of the Philippines. An 4Ps program sa DSWD molastar ini nan lima ka tuig ug bulahan kadtong mga indigent families nga napili sa DSWD tungod kay makadawat sila matag buyan nan cash assistance hangtod sa lima ka tuig apan kinahanglan gajud na masunod nila an mga kondisyones aron padajon sila sa pagdawat sa amo na mga grasya. May  taghimo na orientation sanan panagtigum sa mga beneficiaries an DSWD Regional Office aron ila masabtan an tumong sanan tujo sa 4Ps program labina gajud an taglatid na mga kondisyones.

9.  Sa sports, cultural show development ug turismo … Gikan sa kalihokan nan fiesta paduyong sa Adlaw nan Alegria sa tuig 2009, nakapahigayon kita nan mga sportsgames, show presentations sama sa videoke challenge ug hip hop dance contest sanan municipal agro-fair diin an matag barangay nakahimo nan mga booth na didto nila tag display an mga produkto na gikan sa uma sama sa gulay sanan iban na mga lagutmon. May ila isab tagdisplay na mga handicraft items sama sa tamboo na silhig, kalo, hand bags  na taghimo gikan sa abaca ug iban pa isab na mga souvenir items made of nito.

Ato isab tagpahigayon an primero na KABIBO Festival. Dinhi may contest sa pinaka da best na kape, bibingka ug bodbod na gikan sa bugas humay. An nakadaug na barangay na marajaw mohimo nan kape sanan bodbod, amo ang Barangay Anahaw. Samtang an Brgy. Budlingin amoy nakadaug sa best bibingka made of rice. Ini na kalihokan tagsuportahan pagdajaw nan DTI Surigao del Norte diin sila amoy mihatag nan technical sanan cash assistance sa mga nakadaug na mga barangay sa KABIBO Festival, diin ako tagpanghinaut na ila unta ipadajon an ila nasugdan kay makatabang man ini isip ila additional income o livelihood project labina sa ato mga kababajen-an.

Sa natad sa turismo, dako nako na kalipay na an ato Lumondo WaterFalls did-on sa Barangay Budlingin nakilay-an na sa iban  lugar tungod kay ini nabisitahan na sa GMA ug ABS-CBN, mga dagko ini na television network sa Pilipinas diin tag-feature an Lumundo Falls nan ini na mga TV networks. Gani sa milabay na mga semana, tagbisitahan na isab pag-otro an Lumondo sa The Filipino Channel (TFC) nan ABS-CBN, this time, global na ang pag feature sa Lumondo Falls. Hamok pa an ato ibutang did-on na mga estractura sa falls para gajud ini sija mahimo na inila dili lamang sa ato Caraga Region kon dili makilay-an inin Lumondo Falls sa iban na rehiyon ug malakip sija na isa sa mga major tourist destinations. Ato lamang i-ampo o ipang hinaut na buligan kita sa kahitas-an na makagagahin kita nan pundo pagpalambo nan ini na natural resource para makatabang ini, dugang kita sa mga katawhan dinhi sa alegria kay mokusog man an turismo. Kay matud pa “ Kong may turismo, may trabaho”.

Jaon pay hamok na mga tourist destination dinhi sa ato lugar, an  Puting-Bato Cave, ang Hot Spring did-on sa Brgy. Pungtod sanan an marajaw nato na palibut sa Mainit Lake. Inin tanan ato pa tagplanohan na develapon ug moabut gajud ini kon ato lihokon.

10. Sa Peace, Security and Disaster Management… Sa kinatibuk-an, an ato lungsod malinawon ug wayay natala na mga dagkong krimen na sarang amoy makadaut sa imahen, sa milabay na tuig 2009. Mga ginagmay lamang na mga salaud sanan mga aksidente sa kadayanan an nareport did-on sa police blotter. Dako ini na accomplishment na nahimo sa ato mga tinugyanan sa balaod tungod sa ila kanunay pagpatrolya, jaon tag-laong na police visibility ila jaon taghimo sa tanang panahon sanan ang paghimo nan checkpoint para pagkontrolar sa mga illegal activities did-on sa kadayanan. Kon magpadajon an pagkamalinawon sa ato lungsod, dako ini na contribution sa kalambuan sa ekonomiya tungod kay mohamok man an investors na mobutang nan puhonan. For this, I would like to commend the police officers for a job well done!

Sa disaster management, dako karajaw ato pasalamat sa kahitas-an na wayay kalamidad na ato tagsinati sa entiro tuig 2009. Apan aya ini magpasabut na relax karajaw kita kay halajo ra an kalamidad sa ato lugar, kay sa pagkakuman, malain na gajud an ato kinaijahan. Inin tag-laong kuman sa mga eksperto sa siensiya na “global warming phenomenon”angay gajud ini nato pangandaman sa tanang panahon. Umay ato himoon kon simbako mohampak ini na mga katalagman sa ato? Umay mga preventive measures aron malikayan nato an dako nga kadaut?

Amo ini an mga pangutana na angayan gajud nato tubagon kay kon mapasagdan, mahisama kita sa iban lugar na dako ang kadaut sa mga kinabuhi ug sa mga propriedad.

Amo man gani na an lungsod sa alegria naningkamot gajud na ma-institutionalize na ang Municipal Disaster Coordinating Office para ini na opisina amoy responsable pagpahigayon ug mga training programs, pag procure o pag source out sa mga materiales o equipments nga magamit panahon sa kalamidad ug pagplastar sa mga response and rescue operations. Kinahanglan jaoy permanente na mga pagbansay bansay sa ato mga katawhan unhon pagdaya an kaugalingon panahon sa mga kalamidad aron malikayan an kadaut. Amo gajud ini an ato buhaton, dili gajud nato ini pagdugayon.

Sa susama gihapon na kalambuan, suyod sa hapit 10 anyos namay fire station building an ato lungsod, kuman pa gajud na-operationalize namay kompleto na naset-up. Sa pagka kuman adunay na kitay municipal fire station office namay  mga personahe, aduna kitay brand new na fire truck na amoy mo respond kon simbako adunay sunog na mahitabo. At least sa pagkakuman, an ato lungsod hinay-hinay na sa pag-angkon sa ini na mga facilidad. Ato isab tagplanohan na makatukod kita nan PNP Building kay dako ini na tabang sa ato lungsod sa peace and security.

11. Sa Agriculture, Fisheries and Environmental Management… Sa kanunay an ako administrasyon mipalujo gajud sa mga mag-uuma aron molambo ang nag-una nato na panginabuhian na amo an panguma. Dili nato malalis na an Alegria amo gajud an nag-una sa

produksiyon nan humay sa tibook probinsiya nan surigao del norte. Amo man gani na daghan kita na tagpahigayon na mga programa na may koneksiyon sa agrikultura sama sa pag-apod apod nan certified palay seeds at government subsidize price, paghatag ug libre na mga liquid foliar fertilizers, pagpahigayon nan mga techno demo farm on palay check program sa departamento sa agrikultura iban sa agricultural training institute aron tudloan an ato mga mag-uuma para modako an ila abot sa humay. Ato isab tag-rehabilitate an mga naguba nato na Farm to Market Road ingon man pagtapos sa aya pa gajud natapos na poblacion to danao farm to market road diin ini nahuman ra gajud sa miagi na tuig na tagpundohan sa departamento nan agrikultura ug sa ato lungsod. Taghimoan pa gajud ini nan fish landing para ad-on na modunggo an ato mga mangigisda sa danao aron masajon na nila pagdaya an mga kuha na isda ngadto sa merkadohan.

Sa miagi na tuig isab, ato tagpromote na magprodukto na gajud an ato mga mag-uuma nan iton tagtawag na “organic rice” kay amo man ini an ato OTOP, an ato One Town One Product. Tagbangan kita ini nan DA ug DTI apan hangtud kuman aya pa gajud ini mapadaghan an produksiyon. Angayan gajud nato ini taga-an isab nan pagtagad tungod kay an merkado kuman pagbaligya nan organic rice, dako ini an demand kay kemikal free man ini na bugas humay amo na taas an presyo sa merkaduhan. Apan dako karadjaw an ako panlantaw na inin organic rice maghamok ra ini an produksiyon kay dili lamang sa ija dako na presyo diha sa merkado apan ini isab makaayo sa ato panglawas kon amo ini an ato kunsomohon.

Sa tuig 2008 ato taglusad an ESMA program, an Ecological Sustainability and Management of Alegria program diin ato gajud ini ipadajon na programa paghipos sa ato mga basura pinaagi sa paghimo nan mga material recovery facility sanan pagpahigayon nan mga composting facility adton mga basura na malata para mahimo ini na organic fertilizer na magamit sa ato mga tanum. Sanan an mga recyclable waste materials mahimo ini na additional income sa ato mga taga-barangay. Ato isab pangusgan an pag implementar sa clean and green program na isa sa mga component sa ESMA program kay nakahatag ini nan ka limpyo nan ato lungsod.

Sa taghimo sa probinsiya nan Surigao del norte search for the Cleanest and Greenest municipality 2009, an alegria napili na isa sa mga top ten municipalities, numero uno sa search for the cleanest public toilet, special award sa cleanest and functional public market, cleanest and well-maintained public high school sa tibook probinsiya.

Sa miagi na tuig 2009, an department of environment and natural resources pinaagi sa CEBEPDAI, CEUFA sanan BURUWA nakatanum nan mga rubber tree seedlings, falcata ug mga fruit  trees sa dul-an 200 ka ektaryas did-on sa kabukiran sa budlingin sanan sa camp eduard. May isab na-establish na agro-forestry project sanan abaca plantation an PACAP (Philippine-Australia Community Assistance Program) sa dili moubos 50 ka ektarya sa budlingin ug camp eduard. May taghatag isab an PACAP na mga stripping  machines na may stock shade sa budlingin sanan camp eduard isip isa sa ila panginabuhian pinaagi sa pagpanghag-ot nan abaca na jaon kuman sa ila mga kabukiran aron mahimo ini na dugang kita sa ila organisasyon sanan sa mga miembro. An PACAP pinaagi sa NGO na Propegemus, Inc. nakapahigayon nan training sa handi-craft ubos sa technical assistance nan DTI unhon sa pag-utilize an nito sanan abaca sa paggama nan kalo, hand bags, sanika sanan iban pa isip dugang kita sa mga miembro na mahilig sa handi- craft and souvenir items making.

12. Sa Entrepreneurship, Business and Industry Promotion… Sa pagkakuman makita na an mga  kalambuan sa negosyo dinhi sa ato lugar. May nag-invest na ug filling station, an Petron; may nadugang isab na investment sa bakery business; sa rice milling business; sa palay and rice trading;  sa restaurant business, an ato Alegre Diner and Grill sanan iban pa na mga restaurants; sa internet café business; junk shop business; copra trading; automotive repair and vulcanizing shops; merchandizing and retail stores; tailoring and beauty parlor shops, water purifying station sanan iban pa na mga small time entrepreneurs na ini kuman nagnegosyo sa ato lungsod.

Sa ato kuman pagtukod nan terminal sanan water system level 3, manghinaut kita na ini amoy makadani ug dugang na mga investors na mobutang nan puhunan.

Padajon kita pagpangita ug oportunidad sama sa mga livelihood funds aron ato matabangan na mapalambo an ato cottage/handi-craft industry; mga food processing plant gamit an ato mga produkto sa uma sanan investment sa fishing industry did-on sa danao, an ato Mainit Lake. Kuman na tuig makatukod kita nan vegetable section building na made of concrete and steel materials tapad did-on sa ato wet market building. Isa ini na mga pamaagi isab maka-aghat nan mamuhunan dinhi sa ato lugar. Ato isab tagtinguha sunod tuig na ato makongkreto an palibut sa ato tianggihan na bisan panahon nan ting-uyan dili na magkalapok an ato mga magtianggihay did-on sa ato merkado publiko sanan maplastar na an supply sa tubig sanan an ija drainage system.

13. Sa Infrastructure Development… Sa milabay na tuig 2009, hamok na karadjaw an mga proyekto na natapus dinhi sa ato lungsod ngadto isab sa ato mga kabaranggayan.

An natapus na mga proyekto na taggastusan sa 2009 20% development fund sanan sa iban na pundo  gikan sa mga ahensiya sa gobierno ug international funding agencies, amo ini an musonod:

1.    Construction of Municipal Development Training Center

2.  Construction of 2 Potable Water Supply Level II did-on sa Brgy. Alipao sanan sa Brgy. Pongtud nga gikan sa DAR-IFAD sanan may local counterpart pinaagi sa equity.

3.    Rehabilitation/Construction of Poblacion to Danao Road with fish landing .

4.    Construction of Street lights sa Brgy. Budlingin sanan sa Poblacion to Danao Road.

5.  Construction of Alegre Diner and Grill and procurement of its audio-visual and kitchen equipments.

6.  Construction of 528 linear meters of concrete line canal at Brgy. Julio Ouano with counterpart funds of Brgy. Julio Ouano, PDAF of Congressman Guillermo Romarate, Jr. and LGU Alegria-20% development fund.

7.  Construction of Water Reservoir at Brgy. Julio Ouano from the Priority Development Assistance Fund (PDAF) of Cong. Guillermo Romarate, Jr.

8.  Construction of Camp Eduard Trading Center funded by GEM-USAid and PDAF of Cong. Guillermo Romarate, Jr.

9.  Construction of Budlingin Trading Center funded by GEM-USAid and PDAF of Cong. Guillermo Romarate, Jr.

10.   Construction of Brgy. Budlingin Health Center funded by AECID- Government of Spain, LGU Alegria and Brgy. Budlingin.

11.   Construction of Budlingin Botika sa Barangay funded by AECID- Government of Spain and Brgy. Budlingin.

12.    Construction of 2 classrooms school building at Brgy. Budlingin funded by Kalahi-Kalayaan.

13.    Construction of 2 classrooms school building at Brgy. Alipao funded by Kalahi-Kalayaan.

14.    Construction of Solar Dryer/Tennis Court funded by Dept. of Agriculture and LGU Alegria

15.    Contruction of Brgy. Camp Eduard to Brgy. Ferlda FMR funded by Kalahi-Kalayaan.

16.    Construction/Rehabilitation of Brgy. Gamuton Basketball Court.

17.    Installation of street lights at Brgy. Gamuton

18.    Construction of Brgy. Camp Eduard Health Center funded by Act for Peace

19. Establisment of BURUWA Agrivet Supply funded by DAR-IFAD jaon ini sija sa Brgy. Budlingin.

On-going construction:

1. Alegria Integrated Transport Terminal

2. Alegria Water Supply System Level III

3. Poctoy Boat Landing Construction by GEM-USAid

4. Brgy. Gymnasium of Brgy. San Pedro funded by PDAF of Cong. Romarate

5. Construction of Alegria Municipal Building funded by PDAF of Cong. Romarate

6. Construction of Budlingin to Puting Bato FMR funded by Kalahi-Kalayaan

7. On-going repair of Legislative Session Hall

8. On-going establishment of Alegria Community E-Center

9. On-going contruction of Sitio Bayagnan Multi-purpose Hall

10. On-going construction of Anahaw Brgy. Hall funded by PDAF of Cong. Romarate

11. On-going construction of Anahaw Brgy. Office funded by PDAF of Cong. Romarate

14. Sa Non-Governmental Organizations (NGOs) Operations and Engagements sa ato Lungsod… Dako nato na garbo na may mga non-governmental organizations an mitabang   pagpalambo sa ato lungsod pinaagi sa ila mga programa sanan proyekto. Amo ini na mga NGO na kabahin isab sa ato kalambuan kuman:

1. Ang PhilDHRRA-Mindanao kon Philippine Partnership for the Development of Human Resources in Rural Areas mipahigayon ug mga programa ingon man proyekto sa duha ka  beneficiary barangays na amo an Brgy. Ombong ug Brgy. San Juan pinaagi sa Training and Education in the Propagation of Sustainable Agriculture and its appropriate technologies.

2. May tagtabang isab an Reach Foundation, Inc. pinaagi sa Agencia Espanyola Cooperacion Internacional Desarollo sa Gov’t. of Spain diin did-on sa Brgy. Budlingin ug Brgy. Camp Eduard nakahatag sila nan mga proyekto sa infrastractura ug panginabuhian sama sa brgy. health center, botika sa barangay sanan livelihood projects.

3. Ug ato isab angay pasalamatan an Surigao del Norte People’s Initiative Development Association, Inc. kon SNPIDA na may funding donor gikan sa World Vision-Australia na nagpahigayon isab nan mga programa sanan proyekto did-on sa Brgy. Ombong, Brgy. Pongtud ug Brgy. San Juan. An SNPIDA me-release sa kantidad 62 mil pesos alang sa ombong schoolroom repair; alang isab sa pagrepair nan Day Care Center sa Brgy. Pongtud sa kantidad 29 mil pesos; pagdonar ug musical instruments sa kantidad 500 mil pesos ug ang HEMACUE FOR HEMOGLOBIN DETERMINATION diha sa ato health center na mikantidad nan 50 mil pesos. May ila isab educational assistance sa mga kabataan na nagtungha did-on sa Brgy. Pongtud, San Juan sanan sa Brgy. Ombong. Inin tanan na mga karadjawan gikan sa SNPIDA napahigayon ini tungod sa makusog na representation ni Hon. Incumbent SB Member Reynaldo Ranay, ang kasamtangan Chairman/Presidente sa SNPIDA.

Dugang na inpormasyon dato tanan, adton 1st quarter sa kuman na tuig, an ato lungsod mipalit nan backhoe, ini na equipo dako karadjaw an gamit sa pagload ug buhangin sa tuyo nato ka mga dumptruck, pagmintinar sa ato mga karsada sanan kanal. Manghinaut kita na madungagan pa nato an ato mga equipments sama sa payloader, grader ug dugang dumptrucks. Kon ato na ini marealize an tanan, dili na kita maglisod pagmintinar sa ato mga kadayanan sanan kon jaoy proyekto na mosuyod sa ato lungsod, maparentahan nato ini sa mga contractors ug dayag na mokita an ato mga equipo.

Sa ato mga sangguniang bayan members, dako an ako pasalamat sa ijo pagsuporta sa mga plano ug programa ubos sa ako administrasyon. Ingon man isab dako ang ako pasalamat sa tanan na mga opisyales sa barangay sanan sa mga empleyado sa ijo makanunayon na suporta.

Isip ijo mayor, ako maningkamot na mapa-uswag gajud nato ang ato lungsod. Ang tema sa kasaulogan kuman sa ika 42 ka tuig na pagkatawo nan Alegria (42nd Adlaw nan Alegria) nag-laong na “ Ang Lungsod Na Maalagaron, Kauswagan Maangkon”.

Atong ipang hinaut na an labaw’ng makagagahum mag-iban sa ato ug giyahan kita nija sa ato mga paningkamot. Daghang salamat ug mabuhay an Alegria!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

RECENT POST
%d bloggers like this: